понедельник, 10 июля 2017 г.

БОБУР ҒАЗАЛИГА МУХАММАС

Келмади менга нетай ҳеч бир томондин яхшилиғ,
Келди золим отган ўқ, келмас ёмондин яхшилиғ,
Сокин дил бўлди хароб, борми туғёндин яхшилиғ,
Ким кўрубдур, эй кўнгул, аҳли жаҳондин яхшилиғ?
Кимки, ондин яхши йўқ, кўз тутма ондин яхшилиғ!

Сен мени бу ношукрлар аҳли билма, эй рафиқ,
Шубҳаи гумон ила қалбимни тилма, эй рафиқ,
Ёмонлиғ мени ўлдирса, таслим бўлма, эй рафиқ,
Гар замонни нафй қилсам, айб қилма, эй рафиқ,
Кўрмадим ҳаргиз, нетайин, бу замондин яхшилиғ!
Яхшилик истаб боқарман, гоҳ ўнгу гоҳ сўлима,
Бу чаманда гул кўпу, ҳеч бири ярашмас қўлима,
Ишқ тузоғига илиндим, доми тушди бўйнима,
Дилраболардин ёмонлиқ келди маҳзун кўнглума,
Келмади жонимға ҳеч ороми жондин яхшилиғ.
Халойиқ ичинда нетай турли томонлиқ, асру кўп,
Боқийдан ҳамма қочар, дунё замонлиқ, асру кўп,
Ишқ аҳлин кўнглида уқбога ёнлиқ, асру кўп,
Эй кўнгул, чун яхшидин кўрдунг ёмонлиқ асру кўп,
Эмди кўз тутмоқ не маъни ҳар ёмондин яхшилиғ?
Кўз кўрар ҳар кун ёмонлиғ, билки тундин яхши йўқ,
Оҳ-воҳинг ким эшитгай, билки мунгдин яхши йўқ,
Ўртанма кўнгил, ўтар бу дамки, ундин яхши йўқ,
Бори элга яхшилиғ қилғилки, мундин яхши йўқ ,
Ким, дегайлар даҳр аро қолди фалондин яхшилиғ!
Истади Намоз ки, Ҳаққа бандалик ҳузур киби,
Кир бу йўлга яхшилиғ топ, тавбаю узр киби,
Чунки топилмас бу янглиғ саодат сурур киби,
Яхшилиғ аҳли жаҳонда истама Бобур киби,
Ким кўрубдур, эй кўнгул, аҳли жаҳондин яхшилиғ?!
Намоз НОРМЎМИН
09.07.2017
BOBUR G‘AZALIGA MUXAMMAS
Kelmadi menga netay hech bir tomondin yaxshilig‘,
Keldi zolim otgan o‘q, kelmas yomondin yaxshilig‘,
Sokin dil bo‘ldi xarob, bormi tug‘yondin yaxshilig‘,
Kim ko‘rubdur, ey ko‘ngul, ahli jahondin yaxshilig‘?
Kimki, ondin yaxshi yo‘q, ko‘z tutma ondin yaxshilig‘!
Sen meni bu noshukrlar ahli bilma, ey rafiq,
Shubhai gumon ila qalbimni tilma, ey rafiq,
Yomonlig‘ meni o‘ldirsa, taslim bo‘lma, ey rafiq,
Gar zamonni nafy qilsam, ayb qilma, ey rafiq,
Ko‘rmadim hargiz, netayin, bu zamondin yaxshilig‘!
Yaxshilik istab boqarman, goh o‘ngu goh so‘lima,
Bu chamanda gul ko‘pu, hech biri yarashmas qo‘lima,
Ishq tuzog‘iga ilindim, domi tushdi bo‘ynima,
Dilrabolardin yomonliq keldi mahzun ko‘ngluma,
Kelmadi jonimg‘a hech oromi jondin yaxshilig‘.
Xaloyiq ichinda netay turli tomonliq, asru ko‘p,
Boqiydan hamma qochar, dunyo zamonliq, asru ko‘p,
Ishq ahlin ko‘nglida uqboga yonliq, asru ko‘p,
Ey ko‘ngul, chun yaxshidin ko‘rdung yomonliq asru ko‘p,
Emdi ko‘z tutmoq ne ma’ni har yomondin yaxshilig‘?
Ko‘z ko‘rar har kun yomonlig‘, bilki tundin yaxshi yo‘q,
Oh-vohing kim eshitgay, bilki mungdin yaxshi yo‘q,
O‘rtanma ko‘ngil, o‘tar bu damki, undin yaxshi yo‘q,
Bori elga yaxshilig‘ qilg‘ilki, mundin yaxshi yo‘q ,
Kim, degaylar dahr aro qoldi falondin yaxshilig‘!
Istadi Namoz ki, Haqqa bandalik huzur kibi,
Kir bu yo‘lga yaxshilig‘ top, tavbayu uzr kibi,
Chunki topilmas bu yanglig‘ saodat surur kibi,
Yaxshilig‘ ahli jahonda istama Bobur kibi,
Kim ko‘rubdur, ey ko‘ngul, ahli jahondin yaxshilig‘?!
Namoz NORMO‘MIN
09.07.2017

Комментариев нет:

Отправить комментарий