воскресенье, 11 февраля 2018 г.

ПРЕЗИДЕНТ ШАВКАТ МИРЗИЁЕВГА ЖУДА ҚИЙИН ҲОЗИР (Kiril ve Lotinda)

Чунки давлат тугаб бўлган ва уни қайта тузиши керак. Давлат нима ўзи? Буни биладиганлар борми? Давлат ҳокимияти қандай ишлайди?. Нима қилса, Олий Мажлис тирилади ва адолатли қонунлар чиқара бошлайди?. Нима қилса, Ижро ҳокимияти, яъни Вазирлар Маҳкамаси мукаммал ишлайди?.
Гулнора Каримованинг порахўрликдаги шериги бўлган Бош Вазир Абдулла Орипов бу ишни амалга оширмаслиги аниқ. Нима қилса Маҳкама (Суд) ҳокимияти мустақил бўлиб, адолатли қарорлар беради? Нима қилса, давлат фақат Президентдан иборат бўлмайди, яъни халқ ва давлат бирлашади? Биладиганлар борми?
Диний соҳа (дин эмас) қайта ислоҳ қилиниши керак. Мусулмонлар уйғона бошлади. Бу яхши, албатта. 1990 йилларда Тожикистонда ҳам мусулмонлар уйғона бошлаганди. Кейин фожеа, яъни фуқаролар уруши содир бўлди. Бунга Ўзбекистонда йўл қўйилмаслиги керак. Аммо дунёда бўлгани каби бизнинг мусулмонлар орасида ҳам иттифоқ йўқ. Мусулмонлар қандай бирлашадилар? Қандай қилиб? Биладиганлар борми?
Сиёсат соҳаси тор мор бўлган. Ҳокимият тармоқлари барбод бўлган. Вазиридан тортиб, ҳокимигача, маҳалла оқсоқлигача порахўр, ўз чўнтагини ўйлайдиган манқуртлар бўлиб қолган. Бундай шароитда сиёсий соҳа қандай ислоҳ қилинади?. Бор, мана майдон очиқ ҳамманга деса, Қирғизистондаги демократия бизга келиб, халқ бир бирини қирмайдими? Унда сиёсий ислоҳотлар қандай амалга оширилиши керак? Биладиганлар борми?
Миллатчилик нишоналари пайдо бўла бошлади эркинлик ҳали келар келмасдан. Бир киши ёзибди, Самарқандда Тожиклар Ўзбек тилида гаплашмайди, деб? Нима бўлади бу ишнинг охири? Биладиганлар борми?
Иқтисод вайрон бўлган. Давлат бюджети 8 Миллиард доллар экан. Ислом Каримов даврида 15 ҳатто 20 миллиард доллар, деб қўшиб ёзилган экан. Мирзиёев бу ишни "Художественная литература", яъни бадиий адабиёт, оддий қўшиб ёзиш, деб атади. Каримов режими ҳақиқий шоиру ёзувчиларни ўлдириб, иқтисодда қўшиб ёзадиган сохта ёзувчиларни етиштирган экан. Бюджет қандай тўлдирилади? Иқтисод қандай оёққа туради? Биладиганлар борми?
Матбуот ўлган, адабиёт ўлган, маънавият ўлган? Булар қандай тирилади? Сўз, фикр ва матбуот эркинлиги қаердан бошланиб, қаерда тугайди? Биладиганлар борми?
Озарбайжонда ва Гуржистонда мустақилликнинг илк йилларида хаёлпараст зиёлилар Элчибей ва Гамсахурдия ҳокимиятга келган эдилар. Кейин маълум бўлдики, сиёсат хаёлпарастлик эмас экан. Натижада бу икки давлатда бу хаёлпараст Президентлардан кейин шундай режимлар ўрнатилдики, халқ ҳақиқий эркинликларни хаёл ҳам қила олмай қолди. Бизда йўқми бундай хаёлпарастлар? Биладиганлар борми?
Ҳозир Президент сиёсий қадамлар отмоқда. Мухолифатчи? Бирор таклифи борми мухолифатнинг? Мухолифат нима ўзи? Биладиганлар борми? Унинг дастурини биладиганлар борми?
Президент гапиряпти, Президент уринаяпти. Оддий халқчи? Жамоатчиликчи? Халқ ўзи ҳаракат қилмаса, жамоатчилик тирилмаса, масъулиятни ўзи зиммасига олмаса, жамият ва давлат қайта тирилмайдику?! Бу иш фақат биргина Президентнинг ташаббуси билан амалга ошмаслиги аниқ. Унда қандай амалга ошади. Биладиганлар борми?
Мактаб, маориф ҳам расво бўлган, чириб битган. Ҳамма имтиҳонлар, тестлар, зачётлар пулга, яъни порага боғланган. Қандай ислоҳ қилинади бу соҳа? Биладиганлар борми? Тиббиёт соҳасини тузатамиз, деган билан орқага кетмоқда? Қандай тузатилади бу соҳа? Биладиганлар борми?
Ўртада фақат Президент Мирзиёев бор. Президент бир гапиряпти, маддоҳлар, лаганбандорлар минг гапиряпти. Нима эмиш, Мирзиёев дунёни ўзгартираётган лидерлар орасига кирганмиш. Ҳой, ноинсоф, ҳали Ўзбекистоннинг ўзи ўзгармадику. Кеча эълон қилинди, иқтисодий тараққиётда 175 ўринда эканлигимиз, ҳуқуқ ва қонуннинг устунлигида охирги ўринларда эканлигимиз.
Хуллас, ҳозирча Президент ёлғиз. Қолганлар қаерда? Мен билмайман. Сиз биласизми? Фақат Президентимиз яшасин, ундай қиляптилар, бундай қиляптилар, деманг. Чунки Ислом Каримовга ҳам шундай, дейилганди. Натижа эса маълум ва машъум...
Илтимос, бу мақолага изоҳ ёзинг. Фақат Президентни мақтаб ёзманг, мени танқид қилинг, энг яхшиси халқимиз қандай қайта тирилади, жамият қандай яхшилик томонга ўзгаради, ҳақиқий маънода эркин ва адолатли давлатни қандай қурамиз. Шу ҳақда ёзинг.
Аллоҳ таоло Президентни қўллаб қувватласин! Менинг билганим шу...
Намоз НОРМЎМИН
11.02.2018
PREZIDENT SHAVKAT MIRZIYOYEVGA JUDA QIYIN HOZIR
Chunki davlat tugab bo‘lgan va uni qayta tuzishi kerak. Davlat nima o‘zi? Buni biladiganlar bormi? Davlat hokimiyati qanday ishlaydi?. Nima qilsa, Oliy Majlis tiriladi va adolatli qonunlar chiqara boshlaydi?. Nima qilsa, Ijro hokimiyati, ya’ni Vazirlar Mahkamasi mukammal ishlaydi?. Gulnora Karimovaning poraxo‘rlikdagi sherigi bo‘lgan Bosh Vazir Abdulla Oripov bu ishni amalga oshirmasligi aniq. Nima qilsa Mahkama (Sud) hokimiyati mustaqil bo‘lib, adolatli qarorlar beradi? Nima qilsa, davlat faqat Prezidentdan iborat bo‘lmaydi, ya’ni xalq va davlat birlashadi? Biladiganlar bormi?
Diniy soha (din emas) qayta isloh qilinishi kerak. Musulmonlar uyg‘ona boshladi. Bu yaxshi, albatta. 1990 yillarda Tojikistonda ham musulmonlar uyg‘ona boshlagandi. Keyin fojea, ya’ni fuqarolar urushi sodir bo‘ldi. Bunga O‘zbekistonda yo‘l qo‘yilmasligi kerak. Ammo dunyoda bo‘lgani kabi bizning musulmonlar orasida ham ittifoq yo‘q. Musulmonlar qanday birlashadilar? Qanday qilib? Biladiganlar bormi?
Siyosat sohasi tor mor bo‘lgan. Hokimiyat tarmoqlari barbod bo‘lgan. Vaziridan tortib, hokimigacha, mahalla oqsoqligacha poraxo‘r, o‘z cho‘ntagini o‘ylaydigan manqurtlar bo‘lib qolgan. Bunday sharoitda siyosiy soha qanday isloh qilinadi?. Bor, mana maydon ochiq hammanga desa, Qirg‘izistondagi demokratiya bizga kelib, xalq bir birini qirmaydimi? Unda siyosiy islohotlar qanday amalga oshirilishi kerak? Biladiganlar bormi?
Millatchilik nishonalari paydo bo‘la boshladi erkinlik hali kelar kelmasdan. Bir kishi yozibdi, Samarqandda Tojiklar O‘zbek tilida gaplashmaydi, deb? Nima bo‘ladi bu ishning oxiri? Biladiganlar bormi?
Iqtisod vayron bo‘lgan. Davlat byudjeti 8 Milliard dollar ekan. Islom Karimov davrida 15 hatto 20 milliard dollar, deb qo‘shib yozilgan ekan. Mirziyoyev bu ishni "Xudojestvennaya literatura", ya’ni badiiy adabiyot, oddiy qo‘shib yozish, deb atadi. Karimov rejimi haqiqiy shoiru yozuvchilarni o‘ldirib, iqtisodda qo‘shib yozadigan soxta yozuvchilarni yetishtirgan ekan. Byudjet qanday to‘ldiriladi? Iqtisod qanday oyoqqa turadi? Biladiganlar bormi?
Matbuot o‘lgan, adabiyot o‘lgan, ma’naviyat o‘lgan? Bular qanday tiriladi? So‘z, fikr va matbuot erkinligi qayerdan boshlanib, qayerda tugaydi? Biladiganlar bormi?
Ozarbayjonda va Gurjistonda mustaqillikning ilk yillarida xayolparast ziyolilar Elchibey va Gamsaxurdiya hokimiyatga kelgan edilar. Keyin ma’lum bo‘ldiki, siyosat xayolparastlik emas ekan. Natijada bu ikki davlatda bu xayolparast Prezidentlardan keyin shunday rejimlar o‘rnatildiki, xalq haqiqiy erkinliklarni xayol ham qila olmay qoldi. Bizda yo‘qmi bunday xayolparastlar? Biladiganlar bormi?
Hozir Prezident siyosiy qadamlar otmoqda. Muxolifatchi? Biror taklifi bormi muxolifatning? Muxolifat nima o‘zi? Biladiganlar bormi? Uning dasturini biladiganlar bormi?
Prezident gapiryapti, Prezident urinayapti. Oddiy xalqchi? Jamoatchilikchi? Xalq o‘zi harakat qilmasa, jamoatchilik tirilmasa, mas’uliyatni o‘zi zimmasiga olmasa, jamiyat va davlat qayta tirilmaydiku?! Bu ish faqat birgina Prezidentning tashabbusi bilan amalga oshmasligi aniq. Unda qanday amalga oshadi. Biladiganlar bormi?
Maktab, maorif ham rasvo bo‘lgan, chirib bitgan. Hamma imtihonlar, testlar, zachyotlar pulga, ya’ni poraga bog‘langan. Qanday isloh qilinadi bu soha? Biladiganlar bormi? Tibbiyot sohasini tuzatamiz, degan bilan orqaga ketmoqda? Qanday tuzatiladi bu soha? Biladiganlar bormi?
O‘rtada faqat Prezident Mirziyoyev bor. Prezident bir gapiryapti, maddohlar, laganbandorlar ming gapiryapti. Nima emish, Mirziyoyev dunyoni o‘zgartirayotgan liderlar orasiga kirganmish. Hoy, noinsof, hali O‘zbekistonning o‘zi o‘zgarmadiku. Kecha e’lon qilindi, iqtisodiy taraqqiyotda 175 o‘rinda ekanligimiz, huquq va qonunning ustunligida oxirgi o‘rinlarda ekanligimiz.
Xullas, hozircha Prezident yolg‘iz. Qolganlar qayerda? Men bilmayman. Siz bilasizmi? Faqat Prezidentimiz yashasin, unday qilyaptilar, bunday qilyaptilar, demang. Chunki Islom Karimovga ham shunday, deyilgandi. Natija esa ma’lum va mash’um...
Iltimos, bu maqolaga izoh yozing. Faqat Prezidentni maqtab yozmang, meni tanqid qiling, eng yaxshisi xalqimiz qanday qayta tiriladi, jamiyat qanday yaxshilik tomonga o‘zgaradi, haqiqiy ma’noda erkin va adolatli davlatni qanday quramiz. Shu haqda yozing.
Alloh taolo Prezidentni qo‘llab quvvatlasin! Mening bilganim shu...
Namoz NORMO‘MIN
11.02.2018

Комментариев нет:

Отправить комментарий